حسام هيكل واحد من أبرز مؤثرين الشرق الأوسط في عالم السوشيال ميديا، مر بتجارب ودراسات كتيرة جدًا في حياته أكسبته خبرات كبيرة ومتنوعة في عالم البيزنس والتنمية الذاتية. أطلق مباردة “عيل يشرف” الشهيرة، وأصدر كتابين بقلمه؛ الأول كان “المعنى في طريقي” اللي اتنشر في 2017، والتاني كان “الوصية” اللي اتنشر في 2019.
حسام وصل لده بعد تاريخ طويل من المحاولات والمعافرة في الحياة، يعني اتخرج من التعليم الفني وخد دبلوم صنايع؛ بعدها التحق بالجامعة العمالية واتخرّج منها، وبعد كده أخد دبلومة مبيعات ودبلومة تسويق SIME، وبعدها أخد دبلومة في علم تطوير الموارد البشرية وعلوم إدارة توجيه وتطوير المؤسسات ICF، وعمل دبلومة حرة ي المسؤولية المجتمعية من جامعة Bath، وأخيرًا دورة أكاديمية إحسان كامب لأحمد الشقيري في كندا.
ده غير مسرته المهنية اللي كافح فيها بشكل مُلهم جدًا، من أول عامل في مطعم كشري، وعامل في الفنادق العائمة، وعامل بنزينة في محطات وقود، لموظف مبيعات مفروشات وبعدها مبيعات عقارات. ومع تطوّره في الدراسة والتحصيل العلمي، بقى مدير تشغيل مبيعات، ونائب مدير إقليمي لقطاع المبيعات بالشرق الاوسط، وبعدهم بقى استشاري تطوير أعمال لشركات استثمار الأموال، واستشاري تطوير لأكتر من 32 شركة جوّه وبرّه مصر. واستشاري سلوكيات العملاء لشركات متنوعة، وأخيرًا مدرس ممارس حر للجامعات في مجالات المبيعات وإدارة الأعمال، ومتحدث تحفيزي للشركات والجامعات.
للمرة التانية معانا حسام هيكل.. من أصحاب قصص النجاح ومشاوير الكفاح المُلهمة جدًا جدًا، واللي أكيدهنستفيد منها كلنا.